Bautista away na gyud ni Andrade

Ang lagsik ug lig-on nga si Rey 'Boom Boom' Bautista nagtinguha nga mohimo og impresyon sa iyang pagsaka og balik sa ring aron sangkaon si Brazilian champion Giovanni Andrade karong buntag sa undercard sa eksplosibong kumbati tali sa middleweight boxers nga sila si Winky Wright ug Ike Quartey didto sa St. Pete Times Forum sa Tampa, Florida.

Timaan nga andam ug kondisyon na kaayo siya sa labing una niyang away sulod sa pito ka bulan, ang notadong Bol-anong boksidor nakakuha og saktong timbang nga 122 ka libras atol sa official weigh-in kagahapon didto sa Ballroom 1 sa Hyatt Regency Tampa. Si Andrade wala sab magpabitin ug mitimbang kini og 121.5 ka libras.

Mao kini ang labing unang higayon nga si WBO No. 1 super bantamweight contender nga si Bautista mopakita sa iyang abilidad sukad niya pakamanga sa ikatulong hugna si Nicaraguan Roberto 'El Chucky' Bonilla niadtong Mayo 20 didto sa Staples Center sa Los Angeles.

Si Bautista gikatakda untang makighamag ni Andrade sa undercard sa rematch nilang Marco Antonio Barrera ug Rocky Juarez niadtong Septiyembre 16 didto sa Las Vegas, apan napugos siya pagsibog sa away human makaangkon og injury sa tuo niya nga bukton atol sa iyang pag-ensayo.

Sa wala pa, mahitabo, si Bautista gikatakda sab unta nga makigbibukbukay batok sa Meksikanong si Alejandro Felix Montiel sa Manny Pacquiao-Oscar Larios undercard niadtong Hulyo 2 didto sa Araneta Coliseum, apan mi-atras gihapon kini gumikan kay naigo sa taas kaayong hilanat ug grabing pag-ubo.

Karon nga nakalingkawas na siya sa dili maayong mga panghitabo, si Bautista nagpanikad nang moaway ug mokulit og impresibong kadaugan dili lamang aron pagpakita nga angayan siyang maoy mosunod ni Manny Pacquiao sa Pilipinas, kondili pagpahilop sa iyang mga kritiko kinsa nagtuo nga padulong na siya moretiro human makasinati og duha ka sunod-sunod nga injury.

Kun ukayon ang rekord, si Bautista maoy inilog gumikan kay wala pa kini pilde sa 20 ka mga away diin 15 sa iyang mga biktima iyang gipakamang. Apan si Bautista wala magabaton og halapad nga kasinatian sama sa na-agian ni Andrade.

Beterano sa 61 ka away, si Andrade nagbitbit sab og makalisang nga rekord nga 52-9 uban ang 43KOs sukad siya nahimong pro niadtong tuig 1993.

Apan karon nagsaka na ang iyang edad ngadto sa 36 anyos, posibleng nadutlan na sa kakapoy ug kaluya ang lawas ni Andrade.

Ang maong pagduda masayran karon sa iyang pakigharong sa 20-anyos nga si Bautista.