Maayong lakang sa Malacañang

Niadtong bulan sa Nobiyembre, 2006 gipamatud-an sa bag-ong henerasyon sa Pinoy cue artists nga ang ilang linya dili maasi-asi sa mga beterano na sa billiard sport. Kini tungod kay gipakita ni Ronnie Alcano ang kalibre sa bag-ong henerasyon sa mga bilyarista human niya buntoga si Ralf Souquet sa Germany aron pag-angkon sa prestihiyosong 2006 Philippines World Pool Championships nga gipahigayon sa PICC didto sa kaulohan.

Nagselebrar ang tibuok Pilipinas sa maong kadaugan ni Alcano. Tiaw ba nga mao may iyang gipilde ang usa sa labing gikaintapang bilyarista sa tibuok kalibotan? Dakung garbo ang naangkon sa atong nasud sa maong kadaugan ni Alcano. Mitaas ang iyang moral tungod kay sa wala pa siya makigharong ni Souquet sa finals, gisubhan man usab ang iyang katakus sa lain pang giyukboang bilyarista sa tibuok kalibotan, ang wala pa tay-i nga si Efren 'Bata' Reyes.

* * *

Pero duna koy usa ka impresyon sa kadaugan ni Alcano nga alang nako, nindot unta kun mahitabo kanunay. Gipasidunggan si Alcano sa Malakanyang tungod sa iyang pagdaog sa WPC. Lakip gani si

Bise Presidente Noli de Castro mipadangat sa pahalipay niini ngadto sa bag-ong world pool champion nga nagdala sa monicker nga Calamba. Alang nako, usa kini ka maayong lakang nga gihimo sa Malakanyang.

Kaniadto gud, mora'g si Manny Pacquiao ray nailhan sa Malakanyang. Pero karon nakita na nila nga ang mga bilyarista nakatampo usab paghatag og kadungganan sa atong nasud. Ubay-ubay na ang mga bilyarista nga gihatagan og pasidungog sa Malakanyang ug sa akong pagsulat niini, ang labing ulahi mao si Alcano. Maayo unta kun magkanunay na kini.

Ang ingon gud niini nga gesture sa kagamhanan makahatag og dugang kadasig sa atong mga bilyarista sa pagpalambo pa gayod og maayo sa ilang abilidad. Pinaagi niini, ilang maamgohan nga gihatagan gayod sila og dakung pagtagad sa gobiyerno. Igo na kining suporta nga ikahatag nato ngadto sa atong mga bilyarista aron mas palambuon nila ang ilang kahanas sa billiard sport.

* * *

Dili pa lang dugay akong nasayran nga may suki diay nga mga magbabasa sa Magbilyar Ta diha sa Dumaguete City ug sa Calape, Bohol. Mga billiard enthusiast usab sila nga kanunay nag-atang ning lindog tungod kay giisip na nila kining kabahin sa ilang kinabuhi. Sa tanang mga suki sa Magbilyar Ta, daghan kaayong salamat sa suporta. Kamo ang akong lamdaman sa pagsulat niining maong lindog. Tungod kaninyo nahimugso kining maong kolum bahin sa billiard sport.

* * *

(Mga sugyot ug pakisayod? Text sa 0910-810552)