Talisay vs. Indonesia

Masukod karon ang abilidad sa mga Sugbuanong basketbolista kun makasugakod ba kini sa international basketball karon diin ang MLSDF-Talisay City Aquastars mo-host sa Panasia Garuda gikan sa Indonesia sa pagsugod sa BAP-sanctioned Señor Henry Lhuillier Cup diha sa Talisay City Sports Complex.

Ang Aquastars ni MLSDF executive director ug head coach Eddie Ybañez makig-engkuwentro sa bisitang Indonesians sa main attraction sa alas 9:00 sa gabii human sa kumbati sa Arthro Kontra Arthritis ug Skygo-backed Tribu Sugbu batok sa Tagaytay-Spring sa National Basketball Conference (NBC) sa alas 7:00 sa gabii.

Ang Aquastars seguradong makasinati gyud og kalisud batok sa Panasia Garuda, nga kasamtangang third-ranked team sa Indonesian Basketball League (IBL).

"This is the first time that we are competing abroad. We're here basically to gain experience and give our players the exposure they need for our campaign in the next season of the IBL which will start this January," matud pang Panasia Garuda, co-owner ug team manager Mon Tasaribo.

Si coach Boysie Zamar, ang chief architect pagpalambo sa Panasian Garuda nga maoy mibitad gikan sa No. 9 ngadto sa No. 3 sa IBL, masaligon nga makahatag og maayong duwa ang iyang tropa ning upat ka adlaw nga torneyo.

"Of course we're here to win, but my boys should work hard for it," matud pang Zamar.

Aron molampos sa ilang tinguha, ang Panasia Garuda kinahanglan nga mopakgang sa opensa sa mga tang-an sa Talisay sama nilang James Laygo, Morsie Akad, Jessie Lumantas ug uban sa mga tang-ang mga guwardiya sama nilang Kim Calo, Kane Abatayo ug Chico Lanete.

"We don't know yet their brand of play but we're ready for whatever they will present during our game. We will give them a good and entertaining fight," matud pang Ybañez.

Gikahinaman sab ang panagsangka sa bisitang Tagaytay-Spring batok sa Tribu Sugbu nga gidumala nilang businessmen Jonathan Guardo ug Lito Gillamac.