Pilipinas daog sa bidding

Ang SGG Sports Promotions ni international promoter Sammy Gello-ani nakabihag og higante human gipilde ang Las Vegas-based Top Rank Inc. ni Bob Arum atol sa purse bidding aron pag-angkon og katungod nga maoy mo-promote sa WBO super flyweight title bout tali sa Sugbuanong si Z 'The Dream' Gorres ug sa Meksikanong kampiyon nga si Fernando Montiel.

Ang purse bid gipahigayon kagahapon didto sa WBO Headquarters sa San Juan, Puerto Rico nga gipasiugdahan mismo ni WBO president Francisco 'Paco' Valcarcel.

Ang SGG Sports Promotions, nga girepresentahan sa banggiitang international matchmaker Sampson Lewkowicz, modawat sa bidding human mibubo sa kantidad nga US$126,000, labaw lamang og kinyentos dolyares sa tanyag sa Top Rank.

"This is a major victory for Philippine boxing. I'm very elated to hear this news," matud pa ni SGG Sports Promotions top honcho Sammy Gello-ani sigun sa taho sa philboxing.com.

Si Gello-ani atua karon sa Florida aron mosaksi sa away ni ALA ring sensation Rey 'Boom Boom' Bautista batok ni Brazilian champion Giovanni Andrade sa undercard sa engkuwentro tali nilang Winky Wright ug Ike Quartey karong Disyembre 2 didto sa St. Peter Square Times sa Tampa.

Ang binakbakay tali nilang Gorres ug Montiel gikatakda nga mahitabo karong Enero 2007 didto sa Manila o dinhi sa Sugbu.

"Right now, the Araneta Coliseum is being considered as the venue of the Gorres-Montiel title fight," matud pa ni ALA big boss Antonio 'Bidoy' L. Aldeguer. "But if Cebu will bid for it, that's a big thing because this is a history making event."

Sumala pa ni Aldeguer, nga ang Golden Boy Promotions, nga maoy promoter ni Gorres, nagplano nga mopahigayon og Philippines vs. Mexico card, sama sa "Mano-A-Mano Pilipinas Contra Mexico" nga gibitoonan ni Manny Pacquiao batok ni Oscar Larios niadtong Hulyo 2 didto sa Big Dome.

Gibutyag ni Aldeguer nga lagmit paawayon sa Gorres-Montiel undercard sila si Rey Bautista, Gerry Peñalosa, Diosdado Gabi ug Jimrex Jaca, nga pulos mga boksidor sa Golden Boy ni boxing great Oscar de la Hoya.

Nagkanayon hinuon si Aldeguer nga dili pa final ang tanan gumikan kay makigsabot-sabot pa sila sa mga kadagkoan sa Golden Boy.

"There's a very strong plan that they will put up a Philippines vs. Mexico card. That's what they're talking about, but that thing has yet to be confirmed because we have to sit down first with Golden Boy because they are the legitimate promoter of Gorres," matud pa ni Aldeguer.