Jaca hayag kaugmaon sa Golden Boy

Sanag ug hayag nga ugma ang nagpaabot ni Jimrex Jaca bisan og gipalukapa kini sa Meksikanong si Juan Manuel Marquez niadtong miaging adlaw didto sa Dodge Arena sa Hidalgo, Texas.

"We will keep Jaca busy. Tonight, he demonstrated that he has a tremendous heart and a bright future. He is only 23 years old and he has a lot to learn but yet he is already ahead of the game," matud pa ni Oscar de la Hoya atol sa post fight press conference sa away nilang Marquez ug Jaca.

"Jaca is a strong fighter with an amazing ability to take punches," dugang pa ni de la Hoya.

Si de la Hoya naglaraw nga iyang ilakip si Jaca sa undercard sa gikatakda niyang super-fight batok ni 'Pretty Boy' Floyd Mayweather sa Mayo 5, 2007 didto sa Las Vegas.

"It's going to be fun promoting him and you know we will have to go back to the drawing board and see who he is going to fight next," nagkanayon si de la Hoya, nga mipapirma og kontrobersiyal nga tulo ka away nga kontrata ni Jaca tulo ka semana ang milabay.

Atol sa labing una niyang away ubos sa Golden Boy Promotions, impresibo kaayo ang gipakitang abilidad ni Jaca.

Apan wala siya makalahutay gumikan kay gipakamang man siya ni Marquez sa ikasiyam nga hugna atol sa ilang WBO interim featherweight title fight niadtong Dominggo.