Welcome back Manny Pacquiao

Gihangop sama sa usa ka bayani si Manny 'Pacman' Pacquiao atol sa iyang pagbalik dinhi sa nasud kagahapon human sa dalaygon niyang pagpalukapa sa Meksikanong si Erik Morales sa ikatulong hugna didto sa Las Vegas.

Kabahin sa engrande ug bonggang "hero's welcome," usa ka motorkada didto sa mga dagkung kadalanan sa kaulohan nga gibahaan sa katawhan ang gipahigayon alang kang Pacquiao.

Nakabara sa trapiko ang maong parada apan gikalipay gihapon kini nila agi'g pasidungog ni Pacquiao, kinsa nakahatag og laing dungog ug garbo sa tibuok nasudnong Pilipinhon.

Ang nakaparat kay gisakyan sa mga politiko ang pagka-popularidad sa 27-anyos nga si Pacquiao.

Si Pacquiao miabot sa Ninoy Aquino International Airport Terminal 2 mga alas-5:45 kagahapon sa buntag diin siya gisugat sa iyang inahan nga si Dionisia ug tulo niya ka mga anak.

Pagka alas-8:00 sa buntag sa wala pa siya mobisita ni Mayor Lito Atienza alang sa usa ka courtesy call ug usa ka press conference, si Pacquiao misimba una sa Minor Basilica of the Black Nazarene didto sa Quiapo.

Human sa presscon, si Pacquiao milahos sa Malacañang Palace aron mag-courtesy call ni Presidente Gloria Macapagal- Arroyo.

Atol sa ilang paghimamat, gidayeg og maayo ni Arroyo si Pacquiao sa dili hitupngan nga nahatag niining kadungganan sa nasud.

"Manny will always be our hero, the bearer of the Filipino dream of winning the good fight in all fields of human endeavor," matud pa ni Arroyo.

Dihang gipangutana kun mosakay ba siya sa karera sa politika, si Pacquiao mitubag nga wala pa kini niya huna-hunaa sa pagka karon.

"I am not thinking of that at this time," matud pa ni Pacquiao.

Duna nay mga hugon-hugon nga si Pacquiao modagan pagka-bise mayor sa Manila sa umaabot nga eleksiyon karong Mayo 2007. Iyang tandem mao ang anak ni Lito Atienza nga si Ali, nga nagpanikad nga maoy mohulip sa trono nga biyaan unya sa iyang amahan.