Lamok-lamok sa Mandaue

Mibahad si Donnie 'The Snakeman' Nietes sa ALA Stable nga iyang pakamangon sud sa unom ka hugna ang Indonesian nga si Heri Amol sa 12 ka hugna nilang kumbati sa bakanteng World Boxing Organization (WBO) Asia Pacific title karong gabii diha sa Mandaue City Cultural and Sports Complex.

"Ato lang tan-awon, segurado ako siyang tumbahon sa ikalima o ika-unom nga hugna," matud pa ni Nietes atol sa official weigh-in ug press conference kagahapon didto sa Marco Polo Plaza.

"Akong buhaton kutob sa akong mahimo aron malingaw og maayo ang mga manan-aw," dugang pa ni Nietes, nga mas taas og lima ka pulgada ni Amol.

Kun lawas lang maoy lantawon, mas inilog si Nietes, apan ang trainer ni Amol nga si Antonio Josef Santo Widijana mipasidaan nga isog kaayo ang iyang batos.

"He is a fighter who will fight until death," matud pa ni Widijana.

Si Nietes nagbitbit og baraha nga 18-1-3 (10KOs), samtang si Amol nagtangag og baraha nga 14-3-2 uban ang 4KOs.

Sa undercards sa maong eksplosibong promosyon nga gipasiugdahan sa SGG Sports Promotions ni international promoter Sammy Gello-ani, duha ka batan-ong batos sa ALA Stable nga sila si Milan 'Milenyo' Milendo (7-0, 2KOs) ug Along 'Boholano Bulldog' Denoy (11-6, 5KOs) makigtakos og managlahing kaatbang.

Si Milendo makigsangka batok ni Rommel Bongon sa Tisajo Stable sa Manila, samtang si Denoy makigharong ni Aljun Salogaol sa Jaca Stable sa Sugbo.

Adunay special attraction diin ang labing bag-ong sulbong nga talento sa ALA nga si Joseph Omanz makigbinakbakay batok ni Rey Las Piñas sa Butuan.

Lain pang mokumbati mao sila si Leon Maratas vs. Lotlot Gaviola, Jessie Albaracin vs. Edmund Velayo, Nic Banal vs. Brix 'Bomb' Ray, Weng Haya vs. Alfredo Balabat, ug Franklin Albia vs. Romano Gelig.