Getaruelas, Penales nanghawod

Si Leizel Lumindas-Getaruelas milangkat sa iyang ikapitong championship title sud ning tuiga human niya gidominar ang Women's Open sa Run For Guimaras kagahapon didto sa Marcelo B. Fernan Bridge sa Lapu-Lapu City.

Giangkon ni Lumindas-Getaruelas ang maong kadaugan sa 10-kilometer run-for-a-cause pinaagi sa pagpilde ni Mary Rose Arman sa University of Southern Philippines-Foundation (USP-F), kinsa maoy nag-una sa sayong bahin sa lumba.

Naapsan ni Lumindas-Getaruelas si Arman sa bridge ug wala na kini molingi pa aron pagtapos sa lumba sa oras nga 41 minutos ug 57.76 segundos. Si Arman nitapos og dagan sa oras nga 42:52.13, gisundan kini ni Madelyn Carter (43:35.38) alang sa ikatulong dapit.

Sa men's open, si Joseph Penales sa Dawis, Bohol maoy midominar sa maong event aron paghipos sa iyang ikaupat nga titulo human mitapos og dagan sa oras nga 33:54.50.