Holcim remati sa Jewelers

Ang gipatuasik nga mga puntos sa M. Lhuillier Kwarta Padala-Cebu City Jewelers sa katapusang kuwarter maoy nakapusoy sa Holcim Pryce Pharma-MisOr sa iskor nga 91-82 sa ML Kwarta Padala Mindanao Visayas Basketball Association (MVBA) Second Conference division leaders sa miaging Huwebes diha sa New Cebu City Coliseum.

Ang Jewelers wala kaayo makabiya og daku sa Holcim ug igo lang kini nakalabaw og kuwatro puntos paghuman sa tulo ka kuwarter, 60-56.

Giablihan ni Mike Manigo ang fourth quarter pinaagi sa paglansang og usa ka 3-point shot, gisundan og laing 3-point shots gikan nilang Jett Latonio ug Nino Ramirez, duha gikan ni Stephen Padilla ug tulo sab ka tres gikan ni Danny Aying aron pag-inat sa labaw.

Ang katapusang tres ni Aying maoy nakapahugno sa MisOr nga nakapatul-id sa labaw sa M. Lhuillier ngadto na sa double digit, 89-79, sa nahabiling uno minuto sa duwa.

Sa tibuok duwa, ang Jewelers ni Michel Lhuillier ug coach Raul Alcoseba nibuhi og 13 ka 3-point shots diin unom niini gikan ni Padilla aron pagposte og 25 puntos.

Sa maong kadaugan, ang M. Lhuillier (5-1) milaksi og maayong rekord ning maong liga nga gipaluyohan sa ML Kwarta Padala, Nature's Spring Drinking Water, Cokaliong Shipping Lines, Reva Sandals, Gameface.Ph ug ang Nike Basketball.