Kinailangan ng overtime ng Aces upang makopo ang 97-91 panalo laban sa rookie team na Welcoat sa pagpapatuloy ng Talk N Text PBA Philippine Cup sa Araneta Coliseum kagabi.
Kinubra ng Alaska ang ikatlong panalo sa 10 laro mata[os ang ikawalong talo sa 11-pakikipaglaban.
Pinangunahan ni Nic Belasco ang Alaska sa kanyang 23-puntos na sinundan ni Willie Miller ng 19.
Samantala, magpapatuloy ang aksiyon sa Puerto Princesa kung saan nakatakdang magsagupa ang league-leader na Sta. Lucia Realty at ang paboritong koponan na Barangay Ginebra.
Mataas ang morale ng Realtors na dumating sa Palawan bunga ng impresibong 106-91 panalo laban sa Coca-Cola noong Miyerkules para sa kanilang back-to-back win na nagdala sa kanila sa league-best record na 8-2 kartada at ang pinakamagandang record ng prangkisa.
At kabilang sa biktima ng sorpresang leader na Realtors ay ang mga bigating San Miguel (98-95), Talk N Text (102-90) at Red Bull (105-83).
At ngayon, ang Ginebra naman ang susubok sa tunay na lakas ng Sta. Lucia sa alas-5:00 ng hapong sagupaan sa Puerto Princesa Coliseum, para sa kanilang layuning makakalas sa pakikipagtabla sa 6-4 record sa SMBeer at Red Bull.
Habang sinusulat ang balitang ito, naglalaban ang Air21(4-5) at defending champion Purefoods Chunkee (6-4).