Bobby Pacquiao 'overweight'

Gihuboan nang daan sa iyang bakus ang Pinoy'ng si Bobby Pacquiao isip WBC Continental Americas superfeatherweight champion bisan og wala pa kini magka-engkuwentro sa Meksikanong si Hector Velasquez tungod sa iyang kapakyasan pagkuha og tukmang timbang ubos sa 130-pound division.

Atol sa official weigh-in kagahapon didto sa Hard Rock Hotel-Casino sa Las Vegas, Nevada, misobra og tulo ka libras ang timbang ni Pacquiao sukwahi ni Velazquez nga mitimbang og 129 ka libras.

Gikataho sa Fightnews.com nga ang kampo ni Pacquiao gusto unta nga mobuhi og kuwarta aron resolbahon ang maong kakulian, apan si Velazquez mi-insister nga kinahanglan nga makunhoran og timbang si Pacquiao.

Ang kumbati nilang Pacquiao ug Velazquez duwaon karong gabii (Sabado sa buntag dinhi sa Pilipinas), apan si Velazquez na lamang ang mo-away alang sa korona.

Mao unta kadto ang ikaduhang pagdepensa ni Bobby sa bakus nga gihigot niya sa iyang hawak human pakamanga ang Meksikanong si Carlos Navarro sa ikapitong hugna atol sa ilang away niadtong Hunyo 17 sa miaging tuig didto sa Table Mountain Casino sa Friant, California.

Sa miagi niyang pagpanalipod sa iyang korona, gipatikangkang ni Bobby si kanhi two-time world champion Kevin Kelly sa ikaupat nga hugna niadtong Hunyo 10 didto sa Madison Square Garden sa New York.