Ang home team Talisay City Aquastars ni head coach ug MLSDF executive director Eddie Ybañez mo-host sa bisitang Iligan Archangels ni mayor Lawrence L. Cruz ug coach Ed Arugay.
Ang Aquastars ug ang Archangels nahimutang karon sa ikatulong puwesto sa tagsa-tagsa nila ka dibisyon bitbit ang managsamang baraha nga 2-3.
Hinuon nakaangkon og dugang kadasig ang Aquastars gumikan sa pagbalik sa beterano nilang sharp-shooter nga si James Laygo.
Seguradong daku og matabang si Laygo nilang Bruce Dacia, Leo Bat-og, Rino Berame, Morsie Akad, Jessie Lumantas, Kim Calo, Von Lañete ug Kane Abataya sa opensa.
Sa habig sa Archangels, ilang saligan mao sila si MVBA scoring leader Dino Cabili, Jeffrey France, Francis Sanz ug Marvin Tundag.
Sa pasiunang duwa, ang Cebu Landmaster-Mantawi ni Joe Soberano ug coach Jun Tan makighamag batok sa Lanao Royals ni Gobernadora Imelda Q. Dimaporo ug coach Angelito Quidlat.
Ang Mantawi nahimutang karon sa ikaduhang dapit sa Visayas Division bitbit ang 3-2 win-loss record, samtang padayong nanikaysikay ang Royals gumikan kay kausa pa kini makadaog sa unom ka duwa.