Pangandoy sa DTCC nga ilang maharos og daog ang National Dancesport Championship nga gitakda sa Nobiyembre 18 didto sa Philsports Arena sa Pasig City.
Si DTCC head coach Loloi Rendon nagkanayon nga kun unsay nahitabo sa mid-ranking dili na kini mahitabo pag-usab ning higayona tungod kay ila na nga gipangandaman ang maong kompetisyon.
"Nademoralize man gud to sila kay wala mi. This time, kampante ko nga makabawi sila and we will be able to defend our title last year," matud pang Rendon.
Malaumon si Rendon nga ang team makabuga og impresibong performance bisan pa og wala siya sa line-up.
Ang long-time dance partner ni Rendon nga si Cebu City Sports Commission dancesport directress Eleanor Hayco makigparis ni Thomas Audyn Ingan ning higayona.
Gibanabana nga moabot sa 79 dancesport bets ang mosalmot nga gipangulohan sa beteranong si Michael Mendoza, Dearlie Gerodias, Jenevieve Camacho, Joel ug Anna Madera, Ricca Alix ug Renante Saldua.
Ang top Cebuano dancesporters ang wala pa sa maong line-up, apan gipaabot nga kabahin lang gihapon sila sa final showdown.
Ang standard D ug E class maoy gidugokan sa Cebuano entries uban ang siyam ka managtiayon, samtang ang special event II alang sa mga babaye adunay unom ug ang special event III alang sa babaye adunay tulo.
Ang DTCC adunay duha ka entries sa standard A nga sila si Jojie ug Jonah del Rosario ug nilang Richard ug Liezel Cania, samtang sa standard B adunay tulo ka Cebuano couples, lima sa youth A, tag duha sa junior A ug juvenile ug tagsa ka entry alang sa standard C, senior-A ug C ug youth C.
Sa latin discipline, aduna sab silay duha ka entries sa class A uban nilang Karla Fornolles ug Jimmy Noel ug Jennifer Amahan ug Israel Rona.
Sa latin D, upat ka Cebuano couples ang morampa, lima sa class C, upat sa youth A ug tulo sa level D.
Samtang sa juvenile division adunay tagduha ka entries sa junior A ug senior A ug tagsa ka entry sa B, senior C, youth C ug junior C.