Catmon mipalayas sa Carmen sa 2nd Guv Gwen Garcia Unity Cup

Ang Cluster V defending champion Catmon nisugod sa ilang kampanya pagdepensa sa ilang titulo pinaagi sa pagpilde sa Carmen sa 2nd Governor Gwen Garcia Unity Volleyball Cup For Women kagahapon didto sa Catmon Sports Complex.

Ang Catmon, nga mao usab ang sub-cluster top squad mipalayas sa Carmen pinaagi sa pagdaog sud sa duha ka sets sa iskor nga 25-9, 25-7.

Sa laing bahin, ang runner up Sogod mipakgang sa Borbon sa sunod-sunod nga sets, 25-20, 25-15.

Ang Compostela, yano kaayong nidaog batok sa Danao, 25-9, 25-10.

Sa Tudela, Camotes Island, ang host-Tudela ug ang San Francisco nakatilaw sab og daog batok sa ilang tagsa-tagsa ka kaatbang.

Ang San Francisco nag-agi og kalbaryo una pa nila naangkon ang kadaugan batok sa karibal niining Pilar, 17-25, 25-19, 25-12.

Samtang ang Tudela, nidaog pinaagi sa default batok sa Poro alang sa ilang unang misyon.