Toledo nimakmak sa Tuburan

Ang host Toledo City mimakmak sa Tuburan, 25-6, 25-19, aron pagpangulo sa mga mananaog sa cluster II sa Governor Gwen Garcia Unity Volleyball Cup for Women elimination round kagahapon didto sa Barba Sports Complex Toledo.

Ang host team gipangulohan nilang Sonia Quillobe, Rofel Palao ug Juvy Cabañero sa unang set. Sa second set, si Marites Natad niabag sa tulo nga maoy nakahatag og labad sa ulo sa Tuburan.

Sa unang duwa, gipukan sa Balamban ang Barili sa iskor, 25-13, 25-17 ubos sa paningkamot Alma Romero, samtang ang Aloguinsan ubos nilang Leslie Ann Esconde ug Nonelia Cauba mipukan sa Asturias, 25-12-, 25-10.

Ang Balamban nidaog sa ilang unang duwa sa buntag ug nausban pa kini pagka hapon pinaagi sa pagpukan sa Aloguinsan,25-20, 25-22.

Sa laing bahin, ang Barili nga nakatilaw og kaparotan batok sa Balamban nakabawi pinaagi sa pagpukan sa Asturias, 25-21, 22-25, 25-20.

Ang maong duwa gisaksihan mismo ni Governor Gwendolyn 'Gwen' Garcia nunot sa formal nga turn-over sa volleyball equipment ngadto ni Toledo City Mayor Arlene 'Dydee' Zambo.

Ang aksiyon sa cluster III duwaon karong adlawa diin magtigi sa opening game mao ang Asturias ug Tuburan sa 8:30 sa buntag. Sundan kini sa duwa tali sa Barili ug Aloguinsan ug ingon man Balamban batok saToledo.

Sa hapon, ang Tuburan moharong sa Barili, Aloguinsan batok Toledo, Balamban ug Tuburan, samtang ang Asturias ug Toledo maoy magtige sa katapusang duwa.