Gepiga misakmit og daog

Si Rheno Gepiga sa University of the Visayas-Mandaue misakmit og daog sa junior boys division sa NM Ben Macapaz Chess Clinic Students Chess Challenge diha sa Sacred Heart School-Jesuit gym.

Gidominar ni Gepiga ang duwa uban ang singko puntos nga labaw sa lima ka hugna pinaagi sa pagbuntog sa tang-an nga si Yuri Cauba, ang Milo 2006 MVP sa high school division.

Si Camilo Benabente, sa Don Carlos Gothong MNHS, nakigsawo sa maong kadaugan pinaagi sa iyang 4.5 puntos diin ang iyang teammates nga sila si Ricardo Petalcorin ug Edmund Recaplaza miangkon sa ikatulo ug ikaupat nga dapit.

Lain tinun-an sa UV-Mandaue nga si Alex Angliongto miangkon sa ikalima, samtang si Cauba mipahiluna sa ikaunom nga dapit.

Sa laing bahin, si Mae Anne Bardelas, varsity player sa SHS, maoy nanghawod uban ang 5.5 puntos.

Gisundan kini Glanz Montenegro sa Colegio dela Inmaculada Concepcion nga gibiyaan lang og singko puntos.

Nikompleto sa top-five mao sila si Johannah Esguerra sa SHS (3rd), Kaye Oporto, Alhexiz Enad sa CIC (4th) ug laing tinun-an sa CIC nga si Angogyn Flores maoy nahimutang sa ikalimang dapit.

Sa kiddies division, ang managsuong Balbona mao sab ang nanghawod sa tagsa-tagsa ka dibisyon.

Si Felix Shawn Balbona midominar sa tanang unom ka rounds aron pagdaog sa boys class, samtang ang 8-anyos nga si Rhenzi Sevilleno maoy nakaangkon sa ikaduhang dapit.

Niangkon sa ikatulong dapit mao si Marq Balbona, gisundan ni Bret Monsanto sa SHS-J alang sa ikaupat, samtang si John Balbona maoy nikapyot sa ikalima nga dapit.

Si Jessa Balbona nisunod sab sa kadaugan sa iyang igsuon ug iyang gidaog ang kiddies' mixed division human mirehistro og sayes puntos.

Si Balbona mipatiurok ni Janus Garzon sa Talisay nga misulod sa finals bitbit ang singko puntos.

Wala sab magpaperi si Mary Yap sa SHS-J kinsa niposte og singko puntos aron pagpahiluna sa ikatulong dapit, si Christer Abad sa USJ-R mitapos sa ikaupat nga dapit ug si Marvie Abucay maoy nilingkod sa ikalima.

Ang maong kalihukan gisuportahan ni Chicago-based Rene Sato, uban sa SHS-J pinaagi ni Fr. Julian Hernando.

Ang mga mananaog sa gipasidunggan nila NM Macapaz ug Jonie Davis, AVP sa Banco Filipino.