3 ka Sugbuanong netters nidaog

Tulo ka batan-ong Sugbuanong netters ang nihakot og daog sa Cebuana Lhuillier Tennis Championships didto sa Gingoog City kagahapon.

Si Francis Largo mihipos og duha ka titulo, samtang si Vince Marc Tabotabo sa Tuburan Elementary School nakakuha og titulo ug ingon man usa ka runner-up trophy. Si Franklin Encarnacion misakmit sab og runner-up trophy.

Gidominar ni Largo ang boys' 18 ug 16-under division batok ni Noelito Pacaña sa Cagayan de Oro.

Sa boys' 16-under, si Largo yano kaayong miangkon og daog sulod sa duha ka sets, 6-1, 6-3.

Sila si Largo ug Pacaña nag-abot pag-usab sa boys' 18-under, apan si Pacaña wala makalahutay ug miundang.

Sa laing bahin, si Tabotabo nga gisuportahan nilang bise gobernador Greg Sanchez ug Tuburan Tennis Club president Jude Laurel nangharos sa 10-under class.

Si Tabotabo mibuntog ni Spencer Sagrado sulod sa duha ka set 6-4, 6-3 .

Sa boys' 12-under, si Tabotabo mipakita usab og maayong labok batok ni Rarey Batao sa Bukidnon, miyukbo ni Rarey Batao sa 4-6, 3-6.

Ang ikatulong Sugbuanon nga si Franklin Encarnacion sa Dumanjug nakaabot sa championship game sa boys'14-under, apan igo lang kini nga runner-up trophy human kini mapilde ni Juan Paolo Fermin 2-6, 2-6 .