Sila si Bruce Dacia ug Leo Bat-og, nga nagkumboya og 44 puntos, maoy nagpasiugda sa mainitong rally sa Talisay sa katapusang duha ka kuwarter diin ilang gilupig ang Tribu Sugbu sa pinuntosay nga miresulta ngadto sa 18 puntos nga demolisyon.
Human gitak-op ang ikatulong kuwarter uban ang nuybe puntos nga labaw, 80-71, padayong miratsada ang Aquastars ni head coach ug MLSDF executive director Eddie Ybañez hinungdan nga niburot pag-ayo ang labaw ngadto na sa 20 puntos, 103-83, sa katapusang dos minutos sa duwa.
Si Morsie Akad misuporta sab nilang Dacia ug Bat-og pinaagi sa paghipos og 13 puntos. Lain pang tulo ka players ang mitali og kapin sa 10 puntos sa balanse kaayong opensiba sa Aquastars.
Ang 6'7" nga sentro nga si Rino Berame ug Jheysar Esperat mikulit og 11 puntos matag usa, samtang si Jessie Lumantas miamot og 10 puntos.
Nangu sa pilderong Tribu Sugbu mao si Ronaldo 'Magic' Bucao sa iyang 25 puntos. Sila si Doroteo Almacin ug Nyok de Guzman mipupo og 12 ug 10 puntos.
Ang maong duwa kabahin sa selebrasyon sa tinuig nga pangilin sa pista sa Boljoon karong Nobiyembre 10-11. Gipaluyohan sab kini ni Boljoon Mayor Deogenes 'Wargong' Derama.