Sta. Fe champion na sa Cluster IV

Ang Sta. Fe nipakita og milagro atol sa ilang pagpanulong dihang ilang gipakauwawan ang Medellin sa kaugalingon nilang balwarte aron pag-angkon sa kampiyonato sa Cluster IV sa 2nd Governor Gwen Garcia Unity Volleyball Cup for Women kagahapon didto sa Medellin Sports Complex.

Ang Sta. Fe nahimong sub-cluster champion human kini makahipos og duha ka daog sa eliminasyon niadtong Sabado. Nidaog kini batok sa Bantayan ug Madridejos.

Ang bisitang Sta. Fe midaog sa host Medellin sulod sa duha ka sets, 25-15, 25-23 aron pagbulsa sa P20,000 cash prize, samtang ang gibiktima niini gitunolan og P10,000.

Bisan sa ilang kaparotan, ang Medellin makig-uban gihapon sa Sta. Fe alang sa Guv Gwen Unity Cup finals diha sa Mandaue City.

Lain pang qualifiers mao ang Cluster I champion Talisay City uban sa runner-up Minglanilla, Badian ug Boljoon (Cluster II) ug Toledo ug Balamban (Cluster III).

Sa laing bahin, aduna pay duha ka cluster nga magsangka ug adto kini duwaon sa Danao City.