Human sa ilang pagpanghawod sa 2006 Gawad Kalinga 10K Run sa miaging buwan, sila si Penales ug Lumindas-Getaruelas padayon nidominar sa ilang tagsa-tagsa ka dibisyon kagahapon.
Si Penales nikulit og laing daog sa men's division, dihang iyang gitapos og dagan ang 5K sud lamang sa 15 minutos ug 32.31 segundos aron pag-angkon sa P3,000 nga ganting salapi ug tropeyo.
Ang second placer napunta ni Raul Lamprea sa Holy Cross sa Davao City, kinsa ni-oras og 15:54.82. Iyang naangkon ang P2,000 ganting salapi ug ingon man tropeyo.
Nikompleto sa nag-unang tulo ka mga dapit ning maong lumba nga gipaluyohan ni Jonathan Guardo sa Guardo Group of Companies mao si Adonis Singson, kinsa milabang sa finishing line sa oras nga 16:18.89. Nakabulsa usab kini og P1,000 ug tropeyo.
Sa iyang bahin, si Lumindas-Getaruelas, mao usab ang naghari sa distaff side sa oras nga 19:28.39, samtang si Mary Rose Arman sa University of Southern Philippines-Foundation (USP-F) maoy nipahiluna sa ikaduhang dapit sa oras nga 19:42.41.
Ang ikatulong dapit nakuha ni Sheena Gacayan sa University of Cebu (UC) sa oras nga 20:10.97.
Ilang nadawat ang ganting salapi sama sa gihatag ngadto sa mga mananaog sa men's division.
Nitambong sab sa awarding ceremonies mao sila si Cebu City Vice Mayor Michael Rama ug Sambag I barangay captain Gerry Guardo.