Tigers pinabagsak ang Dragons

Nagpakitang gilas ang Fil-Am rookie na si Chris Pacana nang magbida ito sa final quarter para sa Coca-Cola tungo sa kanilang 92-86 panalo laban sa bagong saltang Welcoat Paints sa pag-usad ng elimination ng Talk N Text-PBA Philippine Cup sa Araneta Coliseum.

Umiskor si Pacana ng 14-puntos sa ikaapat na quarter kabilang ang apat na puntos sa huling 18.8 segundo ng labanan tungo sa ikatlong panalo ng Coke matapos ang pitong pakikipaglaban.

Naipalasap ng Tigers ang ikalimang talo sa Dragons sa likod ng pagkawala nina Ali Peek (knee injury), William Antonio (groin) at Neil Raneses (may emergency sa pamilya).

Tumapos si Pacana ng 18-puntos sa likod ni Allan Salangsang na nanguna sa Tigers sa kanyang 21-puntos.

Habang sinusulat ang balitang ito, nakikipaglaban ang Ginebra na nais bumangon sa dalawang sunod na talo sa kulelat na Alaska. (Mae Balbuena)