Jewelers nakabawos sa Mantawi

Ang tirador nga si Stephen Padilla mipabuto og 11 sa iyang 15 puntos sa ikatulong kuwarter aron paggiya sa M. Lhuillier Kwarta Padala-Cebu Jewelers ngadto sa 83-75 nga kadaugan batok sa Cebu Landmaster-Mantawi sa ML Kwarta Padala Mindanao Visayas Basketball Association (MVBA) Second Conference sa miaging gabii diha sa Cebu Coliseum.

Ang Jewelers naglabaw lamang og uno punto human sa first half, 38-37, apan si Padilla kalit nga nagmangtas pinaagi sa paglansang og tulo ka sunod-sunod nga 3-point shots sa ilang mainitong 19-8 run.

Si Enrico Llanto nakatampo og sayes sa maong rally nga maoy nakapalabaw sa M. Lhuillier og usa ka dosenang puntos, 57-45.

Hinuon, 15 puntos ang kinadak-ang labaw nga nahimo sa Jewelers, 64-49, human sa breakaway lay-up ni Woodrow Enriquez gikan ra sab sa kaugalingon niyang steal sa nahabiling 53 segundos sa ikatulong kuwarter.

Sukad niadto, salida na tanan sa Jewelers gumikan kay igo lamang nakasikit ang Landmasters sa iskor nga 67-73 human sa duha ka free throws ni Carlos Sayon sa nahabilin nga 2:42 sa duwa.

Si Enriquez, kinsa mipasud og unom sa pito niya ka field goals, maoy nangulo sa M. Lhuillier bitbit ang 19 puntos, pito ka assists, duha ka rebounds ug duha usab ka steals.

Si Llanto miamot og 11 puntos, samtang si Danny Aying midugang og 10 puntos ug lima ka rebounds alang sa Jewelers nga nagsolo na karon sa liderato sa Visayas Division bitbit ang 2-1 win-loss record.

Gawas niini, nakabawos sab ang M. Lhuillier sa ilang 79-83 nga kaparotan sa Cebu Landmaster niadtong Oktubre 19 didto sa Mandaue.

Si Carlos Sayon maoy nangulo sa Cebu Landmasters sa pagkulit niini og 19 puntos, upat ka rebounds ug upat sab ka assists. Si JR 'Baby Shaq' Quiñahan mitampo og 10 puntos alang sa Mantawi nga nakatilaw sa ikaduha niining sunod-sunod nga kaparotan.