Realtors lider pa rin

Patuloy ang pamamayagpag ng surprise leader na Sta. Lucia Realty upang manatili sa liderato habang sumulong sa ikatlong sunod na panalo ang San Miguel Beer sa dalawang magkahiwalay na provincial game ng Talk N Text-PBA Philippine Cup kahapon.

Sa San Fernando, Pampanga, humakot ng career-high na 25-puntos si Kelly Williams bukod pa sa 11-rebounds upang pamunuan ang Realtors sa 102-90 pamamayani laban sa bigating Talk N Text sa University of the Assumption Gym.

Sa Subic, Zambales, nagpamalas naman ng eksplosibong laro ang San Miguel Beer upang igupo ang Air21, 118-102 sa Subic Gym.

Gumamit ang Realtors ng 17-6 bomba sa pagtutulungan nina Williams, Kenneth Duremdes at Ronnie Bughao para sa 79-65 kalamangan papasok sa final quarter na kanilang inalagaan tungo sa pagsulong ng Realtors sa 5-1 win-loss slate.

Humataw naman ang Beermen sa ikatlong quarter kung saan naitala nila ang 20-puntos na kalamangan sa 73-53 mula sa lay-up ni Dondon Hontiveros at dalawang freethrows na naging daan sa pag-ahon ng San Miguel sa 3-3 kartada. (Mae Balbuena)