Lacion Stars vs. Visayas Champs sa Consolacion

Magpinatiray na ang mga hinashasang kickboxers nunot sa ipahigayong Kickboxing "Duel Challenge" karong alas-7:30 sa gabii diha sa Consolacion Sports Complex.

Ang undefeated champion nga si Junber Diaz sa Lacion Star manalipod sa iyang korona batok ni San Carlos City Champion Jovel Rico sa Negros Star sa lima ka hugna nilang kumbati.

Lain pang mopakita'g abilidad sa top main events (5 rds) mao sila si Erwin Pulvera sa Lacion batok Army Candilasa sa Mandaue City, Jefrey Pulvera sa Lacion batok Alexis Pesquerra sa Talisay City ug Bronz Diaz sa Lacion Star batok Jhonjer Torbiso sa Cabahug, LLC.

Apan sa dili pa ang ilang away, adunay 10 ka paresan ang mopakita'g aksiyon ning maong kompetisyon nga gipasiugdahan sa DBD Tigers Hall of Martial Arts SDG ug Visayas Full-Contact Martial Arts Federation uban sa abag ni Consolacion Mayor Avel J. Gungob, usa sa mga highlights sa pangilin sa ilang mahal nga patron San Narciso karong Sabado.