Osmeña pakyas pagtumba sa Tribu Sugbu

Nakapanalipod sa ilang balwarte ang Arthro Kontra-Arthritis/Skygo-backed Tribu Sugbu pinaagi sa pagbuntog sa bisitang Osmeña-Cebu sa iskor nga 86-77 alang sa ilang unang back-to-back nga kadaugan sa 2006 National Basketball Conference (NBC) Spring National Cup sa miaging gabii diha sa Cebu Coliseum.

Nasurprisa ang bisitang koponan ni kanhi senador John Osmeña dihang ang Tribu Sugbu milansang og 16-0 pagsugod sa duwa diin ilang napapas ang 13-0 atol sa ilang kadaugan batok sa Cellular Pawnshop-Bulacan duha ka gabii na ang milabay diha sa Minglanilla Sports Complex.

Menos kaayo og tinusakay sa ilang puntos ang duha ka kampo gani ang Tribu Sugbu maoy nadakdakan sa kalisod tungod sa presensiya sa tag-as nga mga players sa Osmeña nga gipangulohan ni kanhi CBF-PBL MVP ug ex-pro Marlon Legaspi. Apan ang abilidad ni Legaspi napuhalan sa batan-ong si Rino Berame.

Gawas ni Berame, kinsa nirumbo sa ilawom, si Jerome Gadiane puwerte sab nga nanginit sa outside shooting aron pagpangulo sa Tribu Sugbu sa iyang 17 puntos, lakip na niini ang tulo ka triples.

Daku sab og natampo si Ronaldo Bucao, kinsa nipatuasik og 13 sa iyang 15 puntos sa second half.

"We now start to realize the Berame factor. He was not around during our first two losses because of the Collegiate Champions League," matud pa ni Jerry Guardo, kinsa usa sa mga tag-iya sa Tribu Sugbu uban ni businessman Lito 'Sirlitz' Gillamac.

"I'm very happy to see the team is now more cohesive and competitive. The players already jell with each others and have adjusted to our system," dugang pa ni Guardo.

Human sa split charities ni Alwyn Espiritu, nga naghatag sa Osmeña-Cebu nga nipatik sa tally board, 1-16, ang bisitang naka-iskor og sunod-sunod nga puntos lakip na ang 11-0 run aron pagkitkit sa labaw gikan sa 20 ngadto na lang sa nuybe puntos, 14-23 sa nahabiling 3:44 sa first quarter.

Nahimong kulbahinam ang duwa dihang usa na lang ka punto ang labaw sa Tribu Sugbu, 38-39 sa nahabiling 40 segundos sa dili pa ang halftime.

Makalabaw unta sa labing unang higayon ang Osmeña-Cebu, apan pakyas kini human si Jonathan Canceran sa UC nasipyat sa iyang itsa. Bugtong nahimo sa Osmeña-Cebu mao ang pagpatabla sa iskor, 42-42 tungod kay SI Gadiane milansang og sunod-sunod nga triples nga maoy nakapaburot sa labaw sa Tribu Sugbu, 50-44 ug ingon pagdominar og balik sa duwa.