Cebu vs. Talisay sa MVBA

Ang MLSDF-Talisay City Aquastars nagpanikad na sa ilang debut sa Mindanao Visayas Basketball Association (MVBA), apan bug-at nga tahas maoy ilang sagubangon gumikan kay ang ilang sangkaon mao man ang inaugural champion M. Lhuillier Kwarta Padala-Cebu City Jewelers sa nagpadayong aksiyon sa ML Kwarta Padala MVBA Second Conference diha sa Talisay City Sports Complex.

Ang duwa gitakdang sugdan sa alas-6:00 sa gabii.

"Ang amo gyud goal maka-enter mi sa finals," matud pa ni Aquastars coach Eddie Ybañez atol sa paglusad sa iyang team kagahapon sa Talisay City Hall. "Lig-on nga team ang M. Lhuillier apan expect namo nga hatagan namo sila og maayong away."

Susama ra gihapon ang iparada nga lineup ni Ybañez sa kanhi niya team nga mao ang Mantawi Traders sa MVBA First Conference.

Sila si Morsie Akad ug 6'7" nga sentro nga si Rino Berame maoy mangu sa Aquastars uban nilang Leode Garcia, Chris Carretas ug Jessie Lumantas.

"I pray for them (Aquastars) that they may win graciously. I hope they will establish friendship and fellowship with the other players from other regions," matud pa ni Talisay City Mayor Socrates Fernandez.

Nagkompleto sa lineup sa Talisay mao sila si Kim Calo, Jhesar Esperat, Von Lañete, Ariel Lozano, Ken Abatayo, Eduardo Arda, Jerry Lumongsod ug Emel Aniñon.

Apan ang Aquastars angayan nga mangandam sa usa ka dakung gubat gumikan kay ang M. Lhuillier ni head coach Raul 'Yayoy' Alcoseba seguradong mopabuhagay sa ilang abilidad aron makabawi sa miagi nilang kaparotan sa mga kamot sa Cebu Landmaster-Mantawi, 79-83, niadtong Oktubre 19 diha sa Mandaue City Cultural and Sports Complex.

Ang kombinasyon nilang Woodrow Enriquez, Stephen Padilla ug Jayford Rodriguez maoy lig-on hinagiban ni coach Alcoseba.

Lain pang ibala sa Jewelers sa ilang duwa batok sa Aquastars mao sila si Mike Manigo, Alano Caputolan, Danny Aying, Aldrin Ocañada, Marlon Piodo, Enrico Llanto, Niño Ramirez ug Mark Abadia.