Peñalosa nidaog pinaagi si TKO

Gipakamang sa Pinoy'ng si Gerry Peñalosa ang WBO top bantamweight contender nga si Mauricio Martinez makatulo ka higayon dayon na ngadto sa pagkulit og makakugang nga kadaugan pinaagi sa TKO sa ikasiyam nga hugna kagahapon didto sa El Paso, Texas.

Maayo kaayo ang debut ni Peñalosa ubos sa mga kamot Golden Boy Promotions ni boxing legend Oscar de la Hoya.

Si Peñalosa, nga gi-train na karon ni Freddie Roach, mitumba sa kanhi world champion nga si Martinez sa una ug ikaupat nga hugna sa wala pa niya hingpit nga gipatikangkang ang Panamian sa oras nga 1:06 sa ikasiyam nga hugna.

Ang kanhi WBC super flyweight champion nga si Peñalosa mi-inat sa iyang baraha ngadto sa 51-5-2 uban ang 34KOs, samtang si Martinez nadakin-as ngadto sa 31-7-1 (21KOs).

Gumikan sa impresibo niyang kadaogan, ang Golden Boy mipasalig nga pa-awayon si Peñalosa og world championship lagmit batok ni Daniel Ponce de Leon (30-1, 28 KOs), nga nakadepensa sa iyang WBO super bantamweight title pinaagi sa pagpakatug ni Al Seeger (27-2, 21 KOs) sa ikawalong hugna sa main event kagahapon.