Tribu Sugbu nakahipos og daog vs. Bulacan

Nakahipos na sab og daog ang Arthro-Skygo Tribu Sugbu pinaagi sa pagpukan sa bisitang Cellular Pawnshop-Bulacan, 89-76 sa National Basketball Conference (NBC) National Cup niadtong Sabado sa gabii diha sa Minglanilla Sports Complex.

Ang Tribu Sugbu nga nagbitbit karon og 2-3 win-loss record ug 1-2 sa ilang home court game, moharong na sab og laing lig-ong team, ang Osmeña-Cebu ni kanhi senator John H. Osmeña diha sa Cebu Coliseum diin ang Tribu Sugbu midaog sa tanang 14 duwa, atol sa championship season niadtong 2004.

Ang duwa gitakda sa alas-7:00 sa gabii.

Si coach Al Solis sa Tribu Sugbu, milusad gilayon og 13-0 aron pagdominar sa maong duwa. Kini maoy unang home victory sa Tribu Sugbu nila ni Jerry Guardo ug appliance magnate Lito 'Sirlitz' Gillamac.

Ang Tribu Sugbu nga daku kaayo'g labaw sa half-time, 50-31 nikompiyansa sa third period hinungdan nga nakagukod ang Bulacan pinaagi sa 12-4 run sa iskor nga 52-62.

Sa tuyo nga dili mahisukamod, ang Tribu Sugbu subling mipabuhagay sa ilang kainit pagsugod sa katapusang kuwarter nga maoy nakainat sa ilang labaw ngadto na sa 24 puntos sa iskor nga 85-61 sa nahabiling 4:23 sa duwa

"Kulang lang ang Bulacan og experienced players pero lisod to kompyansa-an", matud pang Solis ,

Nangulo sa opensa sa Tribu Sugbu mao si kanhi 2005 CESAFI MVP Mark Ababon, ang hometown hero sa Minglanilla, kinsa mikimada og 12 puntos ug laing 11 puntos gikan ni Joseph Ronald Quiñahan.

Mga Iskor:

Tribu Sugbu (89) -- Ababon 12, Quiñahan 11, Almacin 11, Gadiane 9, Ceniza 8, Mercado 6, Co 6, Sevilla 6, Berame 5, Caparros 5, Ramoneda 4, De Guzman 4, Bucao 4, Santos 2

Bulacan (76) -- Ico 17, Go 14, Tiongson 10, Aclon 8, Sergio 6, Delarea 5, Turato 4, Aquino 3, Taligatos 2, Giron 2, Salud 2