Binukbukay sa Mandaue

Nanghinaut sila si Z 'The Dream' Gorres ug AJ 'Bazooka' Banal sa ALA stable nga makalingkawas sa lisud nilang tahas batok sa managlahing Indonesian boxers sa "War in the Ring" card karong gabii diha sa Mandaue City Sports and Cultural Complex.

Si Gorres (24-1-1, 12KOs) makigharong ni Indonesian super bantamweight champion Sonny Manakane (9-2-1, 4KOs) sa usa ka crucial tune-up fight, samtang si Banal (9-0-1, 8KOs) magpas-an sab og bug-at nga hagit sa iyang career sa iyang pakigharong ni IBF Pan-Pacific light flyweight champion Angky 'Time Bomb' Angkota (17-3, 11KOs).

Gikinahanglan nga modaog si Gorres gumikan kay gitakda man siya nga mohagit ni WBO super flyweight champion Fernando 'Cochulito' Montiel sa Mexico. Kay kun masipyat siya, seguradong mahanaw ang iyang dakung oportunidad.

Sa iyang bahin, bug-at sab nga tahas ang pas-anon ni Banal gumikan kay ang iyang away batok ni Angkota maoy mosukod kun andam na ba siya alang sa bigtime boxing didto sa Amerika.

Labaw sa tanan, dili basta-basta ang kontra ni Banal gumikan kay ubay-ubay na sab ang mga sikat nga mga Pinoy'ng boksidor ang iyang gipilde lakip na niini ang duha ka ALA Boys nga si Rocky Fuentes nga iyang gipakamang sud lamang sa usa ka hugna ug si Donnie Nietes nga iyang gipilde pinaagi sa split decision.

Lain pang mga Pinoy'ng boksidor nga gipilde ni Angkota mao sila si kanhi WBA minimumweight champion Joma Gamboa, kanhi PABA light flyweight title-holder Marvin Tampus, ang kasamtangang Philippine champion nga si Sonny Boy Jaro ug si Isidro Lorona sa SSG Stable.

Hinuon si Banal naka-ihaw na sab og dekalibreng langyaw nga mga kontra. Iyang gipatikangkang ang Indonesian champion nga si Ali Rochmad sa ikalimang hugna ug iyang gipasurender sa ikapitong hugna si Thai Sing Carryboy.

Sa undercard, sila si Mark Jason Melligen ug Milan Melindo sa ALA stable mopakita sa ilang abilidad sa labing unang higayon batok sa tagsa-tagsa ka kaatbang.

Si Melligen, nga walay pilde sa upat ka away diin ang tanan niyang daog pinaagi sa knockout, makighamag ni Chris Alag sa Cagayan de Oro City ubos sa light welterweight division, samtang si Melindo makigtige batok ni Ricardo Albia sa Cebu City.

Lain pang mopakita og aksiyon mao sila si Joseph Omanz vs. Tata Galendez, Dennis Juntillano vs. Roldan Malinao, Jun Intor vs. Carlo Magale, Wilson Haya vs. Markyll Taroja, Fernando Otik vs. Elmer Colve ug Gil Melligen vs. Jovy Merca.

Ang mga tiket nagkantidad og P500 sa VIP/Sponsor, P300 sa ringside, P200 sa lower seat, ug P100 alang sa general admission.