Ang bugtong duwa gikatakda sa alas 5:30 sa hapon diha sa Mandaue City Sports and Cultural Complex.
Ang Jewelers ni businessman Michel Lhuillier ug head coach Raul 'Yayoy' Alcoseba moparada sa karaang lineup nga maoy nanghawod sa MVBA First Conference human nila giharos og daog ang "best-of-three" finals batok sa GenSan Pacman (MP Warriors-GenSan na karon).
Ang mga eksplosibong guwardiya nga sila si Woodrow Enriquez, Stephen Padilla ug Mike Manigo maoy tahasan pag-abaga sa opensiba sa M. Lhuillier.
Apan dili sab angayan nga kompiyansaan ang sama og kalibre nilang Jayford Rodriguez, Enrico Llanto, Danny Aying, Alano Caputolan, Marlon Piodo ug Aldrin Ocañada gumikan kay pulos hait ang dinuwaan niini.
Bugtong nadugang sa lineup sa M. Lhuillier mao si Arletroy Mercader, teammate ni Llanto sa USC Warriors.
Sa habig sa Cebu Landmaster-Mantawi (kanhi Toledo) ni realtor Joe Soberano ug coach Jun Tan, gipanday niini og maayo ang ilang koponan pinaagi sa pagkuha ni kanhi pro star player Dale Singson, usa ka lumad nga Mandauehanon.
Sa impresibo niyang rekord pagduwa uban sa San Miguel Beer, Shell ug Coca-Cola Tigers sa PBA, seguradong si Singson maoy masentro sa opensiba sa Cebu Landmaster.
Gawas ni Singson, ang Cebu Landmaster nagabaton sab og 6'6" nga sentro nga si Joel Solis ug ingon man silang Raul Redulosa, Abe Galinato ug Michael Luga.
Makighiusa sila sa puwersa sa karaan nga lineup ni Tan sa Toledo nga mao sila si Alex Cainglet, Bernie Ursal, Rex Mangubat, Richard Ian Saladaga, Carlos Sayon ug Luther Luke Justiniani.
Lain pang mga teams nga mobanat sa Visayas Division mao ang MLSDF-Talisay City Aquastars ni coach Eddie Ybañez ug ang Toyota-Iloilo Warriors.