Si Angkota ug ang iyang trainer nga si Harold Vanroom Errol usa sa mga dinapit sa press conference kagahapon sa "War in the Ring" card diha sa Sen Ryu Japanese Restaurant sa Salinas Drive, Brgy. Lahug ning dakbayan.
Mitambong sab sa maong kalihukan mao sila si international promoter Sammy Gello-ani, Tagbilaran City Mayor Dan Neri Lim, ang tag-iya sa Sen Ryu nga si Jaime Murillo, boxing patron Antonio 'Bidoy' L. Aldeguer ug ang iyang anak nga si Michael, ang narehistro nga manedyer nilang Z 'The Dream' Gorres ug Rey 'Boom Boom' Bautista sa Amerika.
Si Angkota, kansang lawas halos maputos sa mga tattoo, nagbitbit sab og makalisang nga rekord. Katulo lamang siya mapilde sa 20 ka away diin 11 sa iyang mga biktima pulos gipangtumba.
Gipilde ni Angkota ang pipila ka mga prominenteng Pinoy boxers apil na niini ang duha ka ALA Boys. Ang makalilisang niyang away batok ni Rocky Fuentes diin iya kining gipakamang sud lamang sa usa ka hugna. Iya usab nga gipilde si Donnie 'Ahas' Nietes pinaagi sa split decision.
Lain pang mga Pinoy nga gipakamang ni Angkota mao sila si kanhi WBA minimumweight champion Joma Gamboa, ex-PABA light flyweight champion Marvin Tampus ug ang kasamtangang Philippine champion nga si Sonny Boy Jaro.
Sa iyang bahin, si Banal wala malisang sa kabangis ug sa gihuptang baraha ni Angkota.
"Wala ko mahadlok niya. Nanghinaut lang ko nga maayong away akong ikapakita. Dili ko kasulti kun ako siyang tumbahon tan-awon lang unya ni nato sa away," matud pang Banal nga walay pilde sa siyam ka away uban ang 7KOs.
Dili sab basta-basta si Banal gumikan kay nakaihaw na sab siya og lig-on ug langyaw'ng mga kontra. Iyang gitumba ang Indonesian champion Ali Rochmad sa ikalimang hugna. Iya usab nga gipa-undang si Thai Sing Carryboy sa ikapitong hugna usa ka bulan ang milabay didto sa dakbayan sa Tagbilaran.
Sa main event, si Gorres makigtige batok sa laing Indonesian boxer nga si Sonny Manakane sa usa ka crucial tune-up fight. Si Manakane ug ang iyang mga kaubanan gikatakda nga ma-abot karong adlawa.
Bisan og non-title fight, gikinahanglan nga modaog kay gitakda man siyang mohagit ni WBO super flyweight champion Fernando 'Cochulito' Montiel sa Mexico.
Masaksihan karon ang abilidad sa Indonesian boxers gumikan kay mopahigayon sila og public workout karong alas-5:00 sa hapon diha sa ALA Gym Fight Club sa Banilad Town Center.
Lain pang moaway sa "War in the Ring" mao ang duha ka talento sa ALA Stable nga sila si Mark Jason Melligen ug Milan Melindo nga makigharong nilang Chris Alag sa Cagayan de Oro City ug Ricardo Albia sa Cebu City.
Ang mga tiket mapalit na sa USA Sports Boutiques sa SM ug Ayala ug ingon man sa Fight Club sa Banilad Town Center sa kantidad nga P500 sa VIP/Sponsor, P300 sa ringside, P200 sa lower seat, ug P100 sa general admission.