Si Jaca gikatakda nga mo-away batok ni Marquez karon untang Domingo didto sa Don Haskins Center sa El Paso, Texas, apan hangtud karon wala gihapon siya ma-isyuhi og visa hinungdan nga napugos ang manedyer ni Jaca, nga si Rex 'Wakee' Salud pagkanselar sa away.
"Wa tay laing choice kondil i-cancel ang away kay unsaon man nato nga wala man makakuha og US visa si Jaca," matud pa ni Salud sa dihang nahinabi sa Banat News.
"Bisan og makakuha pa siya og visa, dili na gihapon nako siya pa-awayon kay apeke kaayo. Dili ko gusto nga palargahon siya sa Amerika kay patyon ra gihapon kay duol na gud kaayo ang away," dugang pa ni Salud.
Gikaguol og maayo ni Jaca ang talagsaon unta kaayong oportunidad nga miabot sa iyang career. Modawat unta siya og US$50,000 kon P2.55 milyones kun madayon pa ang maong away.
"Nasayangan ko kay talagsa ra kaayo ni nga higayon nga moabot nga maka-away ta para sa world championship. Unsaon ta man, wa man ko makakuha og US visa. Ako ani maghuwat na lang og laing higayon kun ugaling duna pay ma-abot," asoy pa ni Jaca.
Si Jaca adunay appointment kagahapon sa US Embassy sa kaulohan apan mipauli nga walay dala.
"Didto ko sa US Embassy karong hapon (kagahapon) apan gi-ingnan ko pabalikon ko sa alas 10:00 sa buntag karong adlawa," matud pa ni Jaca.
"Naningkamot gyud ko pagkumbinser nila nga boksing ra gyud akong adtoon sa Amerika ug wa nay lain. Mipakita pa gani ko og mga papeles nga didto nako gikan, apan wala gyud koy nahimo," asoy ni Jaca.