Si Marlon Basco mibuak sa 87-87 nga panagtabla human mipasud og undergoal shot, samtang si Bruce Dacia milansang og crucial free throws sa daginutong oras aron pagselyado sa ikatulong daog sa Ozamiz sa lima ka duwa.
Dili matulon ang kaparotan sa Tribesmen nilang Jonathan Guardo ug Lito Gillamac gumikan kay nakabentaha man kini og 16 human sa unang kuwarter.
Apan hinay-hinay nga gikitkit sa Ozamiz ang maong labaw dayon na ngadto sa pagkulit og kadaugan nga nakahugno sa mga fans sa Tribu Sugbu sa maong duwa nga gipahigayon atol sa ika-150 nga founding anniversary sa Cantilan.
Gumikan sa hugot kaayo nilang depensa, gilimitahan sa Ozamiz ang Tribu Sugbu ngadto lamang sa nuybe puntos sa katapusang kuwarter.
Si Joel Co mipabuto og upat ka 3-point shots aron pagtapos og 18 puntos, samtang si Ronald Bucao midugang og 10 puntos ug walo ka assists alang sa Tribu Sugbu, nga mao kanunay ang naglabaw sa wala pa kini mahugno sa katapusang dos minutos sa duwa.
Si Basco mitapos og 20 puntos ug 10 ka rebounds. Wala kaugpo ni Basco ang higanteng sentro sa Tribu Sugbu nga si JR "Baby Shaq" Quiñahan, gumikan kay na-foul trouble kini.
Sa kinatibuk-an, gikastigo sa Ozamiz ni Mayor Reynaldo Parojinog ang Tribu Sugbu sa free throw shooting. Ang Ozamiz mipasud og 28 sa 40 nila ka free throws, samtang ang Tribu tulo lamang sa unom ka free throws.