Ang pagtimaan ug memorya

Ang pagtimaan ug memorya maoy duha sa pipila ka labing mahait nga hinagiban sa usa ka bilyarista. Mahinungdanon kaayo kini ug wala kitay ikahulip isip substitute niini sa ilang role diha sa career sa usa ka magdudula. Importante kini tungod kay maghatag man kini'g katakus sa magdudula sa paghinumdum sa mga sitwasyon nga nangagi ug sa ingon, masuta niya kun diin siya nisipyat ug kun diin siya nilampos. Sa ingon, makorehian niya ang iyang mga sayop.

Importante kaayo ang pagtimaan sa nagkadaiyang plastada sa bola o sitwasyon sa ibabaw sa billiard table. Pinaagi niini, makabaton dayon og ideya ang magdudula kun unsa nga matang o paagi sa tayada ang iyang gamiton aron malutsan niya ang usa ka partikular nga sitwasyon. Kun siya nakaagi na sa maong sitwasyon sa miagi niyang pagdula ug mahinumduman niya kun giunsa niya kini pag-deal nga malampuson, dili na siya maglisod sa pagharong niini. Kay ang kasinatian daku'g ikatabang.

Matud pa sa librong Billiards: The Official Rules and Records Book, ang usa sa duha ka sekreto sa epektibong pagdula mao ang memorya. Sa labing mabaw nga hubad, kini ang katakus sa paghinumdom sa nangagi. Dili lamang maoy angay hinumdoman sa magdudula ang iyang pagkabagat sa maong sitwasyon sa miagi niyang actual play kondili lakip na sa iyang regular practice session.

Matud pa sa BTORARB, "Fifty percent of position play is remembering where the cue ball went after that particular shot."

* * *

Makadaghan na nato tukia dinhi ang bahin sa memorya, apan sa matag karon ug unya nagtinguha ko sa pagpalawom sa atong diskusyon tungod kay nakita ko nga lapad kaayo kining maong tema, as far as billiards is concerned. Daku gayod kini og role diha sa career sa usa ka magdudula. Tiaw ba nga singkuwenta porsiyento man ang giangkon niini diha sa katibuk-ang 100% nga performance sa magdudula.

Tungod niini, dili ikahibulong nga kadtong mga indibidwal nga dili kaayo hait og memorya dili usab kaayo impresibo ang ilang performance sa dula. Mahinungdanon man gud kaayo ang katakos sa pagtimaan ug memorya diha sa dula. Hinuon, ang kalantip sa memorya sa magdudula mahimong masam-id pinaagi sa kanunay nga paggamit niini. Nagkahulogan kini nga mo-step up gayod ang magdudula.

Ang usa ka magdudula nga determinado sa pagkat-on ug pagpalambo sa iyang abilidad sa dula kinahanglang mobaid kanunay sa iyang memorya. Daku man gud kaayo kini'g ikatabang alang sa epektibong pagdula. Diha sa pagbansay, kinahanglan nga ubanan kini sa magdudula sa iyang pagpalihok sa utok. Kay kun ang utok makapahaom na sa tinguha sa magdudula, aduna nay rhythm niini ang iyang lawas.

Kini sab ang gisugyot sa mga banggiitang magdudula sama nila ni Efren 'Bata' Reyes, Ralf Souquet, Mika Immonen, Rodney Morris, Earl Strickland, Johnny Archer ug Corey Duel.

* * *

(Mga sugyot? Text sa 0910-8105522)