Si Reli niabot na dinhi sa Sugbu aron mangandam alang sa Cebu regional elimination.
Nasayran, si Reli napakyas pag-angkon og luna sa Milo Finals sa miaging semana atol sa Metro Manila elimination edition.
"I will just try my luck here in Cebu," matud pa ni Reli, kinsa naghari sa First University Run-Run for Sight niadtong Domingo.
Si Reli naglantaw sa iyang ikalimang Milo regional title dinhi human niya nadaog ang ang 2000, 2002, 2004 ug 2005 editions.
Sa laing bahin, ang one-legged triathlete ug Pinoy Big Brother Celebrity Edition (PBBCE) housemate nga si Rudy Fernandez sa Iloilo City modagan sa 5K race karong Domingo.
Mo-abaga sa trip ni Fernandez mao ang Rajah Park Hotel, Trans Asia Shipping Lines, Casa Ilongga-Robinson's Place ug Orthpaedie Frey Far East Inc. ubos ni Dr. Constancio dela Cruz.
"We are happy to sponsor Rudy's accommodation, he is a true inspiration for the differently-able," matud pa ni Heide Cabaluna, ang marketing manager sa Rajah Park Hotel.
Naila isip "Ironman of Asia" sa PBBCE, si Fernandez nidaog og pipila ka international marathons lakip na ang Standard Chartered Hong Kong Marathon ug Singapore Marathon.
Silver medalist siya sa 1972 Pesta Sukan Trackfest sa Singapore ug kanhi national record holder sa 1,600 meters event.
Awardee usab si Rudy sa "Reader's Digest Hero for Heroes" human niya gilangoy ang 28 milyas gikan sa Guimaras ngadto sa Bacolod City sud sa otso oras. Niadtong Septiyembre 2000 nilibot siya gikan sa Iloilo City ngadto sa Camp Macario Peralta sa Jamindan, Capiz aron makakuha og pundo alang sa mga biniyaan ug nailo sa mga Ilonggo army nga namatay sa Mindanao.