Kulang ng sentro ang SSC Stags

Kung sa mga nakaraang taon ay naging dominante ang San Sebastian College-Recoletos dahil sa kanilang mga sentro na nagbunga ng limang sunod na kampeonato sa National Collegiate Athletic Association (NCAA).

Ito ngayon ang kulang sa Stags sa kanilang nanganganib na kampanya sa 82nd NCAA men’s basketball tournament.

"Actually, ‘yung absence ng dominating center talaga ang naging problema namin this year," pag-amin ni coach Raymond Valenzona. "Hindi kami nagko-control ng rebounding kasi nga kulang talaga kami sa malakas na sentro." 

Bunga nito, nalagay sa balag ng alanganin ang San Sebastian mula sa bitbit nilang 4-8 rekord sa second round ng eliminasyon katulad ng University of Perpetual Help Dalta ng dating coach nitong si Bai Cristobal. 

Sa tsansang makahirit ng isang playoff seat para sa No.4 spot sa Final Four, kailangan ng Stags at ng Altas na maipanalo ang huli nilang dalawang laro kasabay ng pagdarasal na matalo ang Mapua Cardinals, may 6-5 baraha, sa kanilang tatlong laban. 

Noong nakaraang taon, tumipa ang San Sebastian ng 7-7 karta para makapasok sa Final Four kung saan sila tinalo ng Letran, 60-93, patungo sa korona ng Knights.

"Sabi nga sa akin ng daddy ko (Turo Valenzona), parang learning experience na rin ito sa akin since first year ko lang humawak ng seniors team," ani Valenzona. "Pero next year baka i-give up ko na ‘yung sa juniors." 

Si Valenzona ang naghatid sa Staglets sa korona noong nakaraang taon laban sa San Beda Red Cubs. (Russell Cadayona)