AMBL niposte 2 daog sa CITBA-Guardo Cup

Ang AMBL ni Allan Lim niposte sa ikaduhang sunod-sunod nga daog human gipilde ang Big Three, 99-93 kagabii sa Cebu Institute of Technology Basketball Association (CITBA)-Guardo Cup basketball tournament diha sa Vicente Sotto Memorial gym sa barangay Punta Princesa, ning siyudad.

Ang Big Three nakabentaha og 18 puntos, 52-34 sa first half, apan ang AMBL mipatuman sa ilang hugot nga depensa aron pagkitkit sa labaw ngadto na lang sa 10 puntos, 62-72 sa third quarter.

Miaginod og kamang ang AMBL hangtod nga nagsinukliay kini sa ilang opensa nga miresulta ngadto sa lima ka panagtabla human nasulod ang free throws ni Rey 'Big Boy' Jumamel nga misangko ngadto sa overtime human magtabla ang iskor nga 88.

Sa dugang singko minutos, wala na kapugngi ang pagpanginit sa AMBL ug ilang gibiyaan hangtod nga ilang nakab-ot ang kadaugan.

Si Lito Navarro nga nibugha og 33 puntos maoy nangulo sa AMBL, samtang si James Lloyd Noel niamot og 21 puntos alang sa kadaugan.

Si Rey Jumamel, nipupo ug mi-ambit sa iyang 13 puntos lakip na niini ang mahinungdanong puntos nga maoy naghatod sa duwa ngadto sa overtime.

Samtang ang nangulo sa pilderong Big Three mao si Eking Pacaña sa iyang 17 puntos, samtang ang managsuong Perez nga sila si Toking ug Titing adunay 16 puntos matag usa.

Sa laing duwa, ang VSC nidaog batok sa Pipeline Resto Bar sa iskor nga 72-65.

Si Danny Santillan maoy nangulo sa maong kadaugan pinaagi sa iyang 21 puntos, uban sa abag nilang Jay-R Gonzaga ug Danny dela Peña nga niposte og 10 puntos matag usa.

Si Meljun Tundag nga ni-iskor og 20 puntos maoy nangulo sa pilderong Pipeline, samtang sila si Pete Patrimonio ug Joel Castro nagkumboya og 29 puntos.

Sa laing bahin, ang UCKI ni Romeo Faunillan niposte sa ilang unang daog sa upat ka duwa human gipilde ang Sanalva sa iskor nga 88-85.