SIMC naghari sa Class A

Gipakgang nilang Edwin Bacarisas ug Andre Villamor sa Southern Islands Medical Center (SIMC) TC ang paresan nilang Titus Tabotabo ug Dodong Ruelan sa Tuburan, 8-4 aron paglangkat sa Class A title sa M. Lhuillier Sports Development Foundation (MLSDF)-backed 1st M. Lhuillier Kwarta Padala Cup Inter-Club Tennis Tournament sa miaging gabii diha sa Alta Vista Golf and Country Club tennis courts.

Sila si Bacarisas ug Villamor wala na milingi pa sukad sila miposte og komportableng labaw, 6-2.

Nagmaya sab silang Richard Zabate ug Elmer Yac sa Pardo TC ingon man silang Lemuel Rubi ug Medjok Paden sa Mactan Island Lawn Tennis Sports Club, Inc. human sila midominar sa tagsa-tagsa nila ka dibisyon.

Sila si Zabate ug Yac nag-agi una og makuyaw nga dalan sa wala pa nila maangkon ang kadaugan batok nilang Caloy Calo-oy ug Junjie Deiparine sa Mactan Island TC pinaagi sa tie-breaker, 8-7 (7-4), aron pagdaog sa Class B+, samtang sila si Rubi ug Paden yano kaayong nidaog batok nilang Jerry Campo ug Danny Largo sa Naga, 8-3, aron pagpanghawod niini sa Class B-.

Wa hinuon mipauli nga way bitbit ang mga batos sa Naga TC gumikan kay silang Rigor Gurrea ug Vennox Garcia midaog man nilang Tata Caballero ug Lito Lanquino sa PHO TC, 8-3, aron pagbira sa korona sa Class C+.

Ang event sponsor M. Lhuillier miapud-apud og kinatibuk-ang P30,000 ganting premyo ug ingon man mga tropeyo.

Mitunol sa awards ngadto sa mga mananaog mao si MLSDF executive director ug multi-titled coach Eddie Ybañez.

Ang torneyo gikatakdang tak-opon karong adlawa pinaagi sa pagtiwas sa kompetisyon sa Class C- ug ingon man sa pag-korona sa overall champion.