Nietes makighilam-osay kumo batok Rubillar

Si RP No. 1 light flyweight contender Donnie 'The Snake' Nietes makighilam-usay na og kumo batok ni Roberto Rubillar sa main event sa "Thrilla in Minglanilla" boxing card sugod sa alas 7:00 karong gabii didto sa Minglanilla Sports Complex.

Ang maong kalihukan gipasiugdahan sa SGG Sports Promotions ni international promoter Sammy Gello-ani inabagan sa MIBA-Association of Barangay Captains ug sa lokal nga kagamhanan sa Minglanilla ubos sa liderato ni Mayor Eduardo Selma.

Mao kini ang labing unang higayon nga mo-away si Nietes sukad siya midaog pinaagi sa desisyon batok ni Noel Veronque niadtong Enero 15.

Si Nietes, nga nagbitbit og 17-1-3 win-loss-draw record uban ang 10KOs, dili angayan nga mokompiyansa ni Rubillar gumikan kay ang naulahi daku ug taas na kaayo og kasinatian ug gani naka-away alang sa WBC Youth light flyweight title, galing lang napilde kini ni Yodsaengsek Por Choomchok sa Thailand niadtong Pebrero 25 sa miaging tuig didto sa Bangkok.

Sa supporting bouts, si ALA Boy Rollen del Castillo makighamag ni Nelson Guidolan, samtang si RP No. 4 light flyweight contender Julius Alcos makigsangka batok ni Bert Gawat.

Sa lain pang aksiyon, sila si Edmund Velayo ug Reman Salim moharong batok nilang Barnold Seniego ug Redgie Binueza, samtang sila si Rascheid Bacus ug Rogen Flores makigbinakbakay batok sa bisitang taga Davao.

Tulo ka mga batan-ong boksidor ang mobanat usab sa preliminaries nga sila si Wilson Haya, Marjo Borres ug Gil Melliguen batok sa managlahing kontra.