Bangaan, Lumbang nagmadaugon

Nagmadaugon ang Bangaan Palawan Bank ug ang Lumbang batok sa ilang tagsa tagsa ka kaatbang sa Cuanos Basketball League 2006 niadtong Domingo.

Ang Palawan Bank nakalingkawas gikan sa mga kamot sa Bucks Riders sa iskor nga 74-73, samtang ang Lumbang nipukan sa Canlontao Siders sa iskor nga 82-71.

Wala damha sa Riders nga ingon niadto ang ilang madangatan tungod kay kanunay kining naglabaw sulod sa unang-tulo ka kuwarter. Apan dihang nagtabla ang iskor, 70-70, sa katapusang dos minutos sa duwa nakakita og higayon ang Palawan Bank pag-ilog sa labaw kortesiya ni Raul Medellada, kinsa nipatuasik og duha ka jumpshot nga maoy nakapayugpos sa Riders.

Nangulo sa kadaugan sa Palawan Bank mao si Aldin Traya sa iyang 15 puntos, 10 ka rebounds ug duha ka assists, samtang ang pilderong Riders gipangulohan nilang Rafael Labrador ug Argie Obcial nga nagkumboya og 22 puntos.

Unom ka magdudula sa Lumbang ang nakakuha og double figures nga maoy yawi sa ilang kadaugan.

Ang Lumbang kasamtangan karong nag-una sa Bracket B bitbit ang 2-0 win-loss records.