UC, USC mag-ilog sa liderato

Duha ka women teams nga wala pa makatilaw og pilde ug pulos adunay kasinatian sa kampiyonato mag-ilog sa liderato, diin ang two-time titlist University of Cebu (UC) Lady Webmasters makigbugno sa karibal niining University of San Carlos (USC) Lady Warriors sa 6th Cebu Schools Athletic Foundation, Inc. (CESAFI) diha sa Cebu Coliseum.

Sa laing duwa, mangita karon og solusyon ang USC Baby Warriors kun unsaon nila pagbangon human sa ilang 39-57 nga kapildihan batok sa University of the Visayas (UV) Baby Lancers sa miaging Sabado dihang makigharong kini sa walay daog-daog nga Don Bosco Greywolves.

Apan ang makadani nga duwa karong adlawa mao ang showdown sa mga banggiitang koponan sa mga babaye.

Dihang naumol ang women's division niadtong tuig 2004, ang UC ug ang USC maoy nag-abot sa finals, diin ang Lady Webmasters ubos sa liderato ni MVP winner Clarissa Lanuza niangkon sa korona sa iskor nga 69-68.

Sa miaging tuig, nag-abot na usab ang ilang dalan ug nagsangka kini sa finals diin ang Lady Webmasters mao gihapon ang niangkon sa kampiyonato human sa ilang 68-63 nga kadaugan diha sa UV gym.

Karon nga season, ang UC ug USC gituohang mao na usab ang mag-abot sa finals.

Nagpahayahay sa managsamang 2-0 win-loss records, ang modaog tali sa UC-USC showdown dili lang makaangkon sa liderato, apan makabentaha sab kini sa September 2 rematch.

Gawas sa tang-an nga si Lanuza, silang Ma. Melrose Pilot, Annabel Nieves, Ma. Lyn Nicolas, Jewel Belonguel, Jackie Lou Taping ug Maricel Fernandez gipaabot sab nga maoy mangulo sa opensiba sa UC.

Sa habig sa USC mao sila si Jessamine de los Reyes, guard Fairlette Ceniza, Dianne Cañete ug Roanne Camille Tan.