"I feel good and the training camp has been perfect. My hand is completely healed and I am ready for Romero," ani Viloria matapos ang kanyang sparring session bilang paghahanda sa kanyang title fight kay Mexican Omar Nino Romero.
Ito ang ikalawang pagkakataon na idedepensa ng 25-anyos na Hawaii-born ang kanyang World Boxing Council (WBC) light flyweight belt matapos itong agawin kay Erik Ortiz noong Oktubre ng 2005.
Matatandaang nagkaroon ng injury sa kanyang kanang kamay si Viloria sa kasagsagan ng kanilang laban ni Jose Antonio Aguirre noong Pebrero.
Sa kabila nito, nakahugot pa rin ng isang unanimous decision si Viloria laban kay Aguirre upang mapanatili ang kanyang korona.
Ibinabandera ni Viloria, tinaguriang "The Hawaiian Punch" sa world boxing scene, ang 19-0 win-loss ring record kasama ang 12 knockouts, habang may 23-2-1 slate naman si Romero, tampok rito ang 10 KOs.
Inaasahang magiging mabagsik si Romero kay Viloria sa hangaring maipaghiganti ang kanyang mga kapwa Mexican fighters na pawang natatalo sa mga Filipino boxers.
Ang huling Mexican na natalo sa mga kamay ng isang Filipino ay si Oscar Larios nang igupo ni Manny Pacquiao noong Hulyo 2. sa Araneta Coliseum. (Russell Cadayona)