Bisitang teams abante sa semis

Mga bisitang players gikan sa Tuburan TC ug Lapu-Lapu TC nimartsa ngadto sa semifinal round sa M. Lhuillier Sports Development Foundation (MLSDF)-organized 1st M. Lhuillier Kwarta Padala Cup Inter-Club Tennis Tournament diha sa Baseline tennis courts.

Sila si Titus Tabotabo ug Dodong Ruelan maoy pabiling nagbarog sa kampo sa Tuburan TC human gipilde silang July Tabura ug Jun Abellanosa sa Pardo TC, 8-2, aron pag-angkon og luna sa Final Four sa Class A division.

Sila si Tabotabo ug Ruelan midalit sa ilang kadaugan ngadto ni Tuburan Mayor Rosemarie Suezo, nga nagsaulog sa iyang adlaw'ng natawhan kagahapon.



Wala sab magpabitin silang Junjie Deiparine ug Caloy Calo-oy sa Lapu-Lapu TC nga nipukan nilang Mike Balazo ug Erwin Yac sa La Paloma, 8-5, aron pag-angkon og luna sa Class B+ semifinals.

Nakig-uban kanila sa semis mao sila si Hurry Abellanosa ug Joseph Ababon nga gipaningot og bogbog una nila naangkon ang kadaugan batok sa teammates sa Pardo TC.

Giunay nila og pilde ang managsuong si Eldon ug Eliezer Yac pinaagi sa tie-breaker, 8-7 (7-5).

Ang PC Hills Organization (PHO) TC, Bureau of Internal Revenue (BIR) TC, Pardo TC ug Cecile's TC mihatud sab og tagsa ka batos ngadto sa quarterfinals.

Sila si Tata Cabañero ug Lito Langkino sa PHO TC nakalingkawas batok sa mga kamot nilang Bebot Obaob ug Efren Miranda sa Pardo TC, 8-7 (7-5), ingon man silang Ricric Ortiz ug Glen Cubero sa BIR TC batok nilang Cesar Manalili ug R. Ramirez sa Lilo-an TC, 8-7 (9-7).

Sila si Esay Labaya ug Joel Badana sa Pardo TC mipakaging nilang Roberto Dabon ug Jun Teves sa Mantads TC, samtang sila si Atty. Escoton ug Pompi Saturinas sa Cecile's TC mibuntog nilang Gingging Dutusme ug Tony Lopez sa PHO TC, 8-6.