'Ahas' katkat balik sa ring

Si Philippine No. 1 light flyweight contender Donnie 'Ahas' Nietes mokatkat og balik sa ring diin iyang harungon si Roberto Rubillar sa main event sa "Thrilla in Minglanilla" karong Agosto 12 didto sa Minglanilla Sports Complex.

Ang maong eksplosibong promosyon gipasiugdahan sa SGG Sports Promotions ni international promoter Sammy Gello-ani inabagan sa MIBA-Association of Barangay Captains ug ingon man sa lokal nga kagamhanan sa Minglanilla ubos sa liderato ni Mayor Eduardo Selma.

Dili sayon nga tahas ang atubangon ni Nietes gumikan kay sangkaon niya si Rubillar, kinsa ni-away alang sa WBC Youth light flyweight title batok ni Yodsaengsek Por Choomchok sa Thailand niadtong Pebrero 25 sa miaging tuig didto sa Thailand.

Sa iyang bahin, si Nietes, nga nagbitbit og 17-1-3 win-loss-draw record uban ang 10KOs, mopakita og balik sa iyang abilidad human gipukan si Noel Veronque pinaagi sa desisyon niadtong Enero 15.

Sa main supporting bouts, si ALA Boy Rollen del Castillo makighamag ni Nelson Guidolan sa Davao City-based Willy Neri Stable, samtang si RP No. 4 light flyweight contender Julius Alcos makigbinakbakay ni Bert Gawat.

Angayan nga lantawon ang 20-anyos nga si Alcos gumikan kay midaog man kini batok sa duha ka kanhi world title challengers nga sila si Wyndel Janiola ug Noel Tuñacao.

Sa lain pang away, sila si Edmund Velayo ug Reman Salim sa SGG Stable makigsangka batok nilang Barnold Seniego ug Redgie Binueza, samtang sila si Rascheid Bacus ug Rogen Flores makigpinaksitay batok sa mga bisitang Davaoeño.

Moabli sa kulbahinam nga aksiyon mao ang tulo ka bag-ong bitoon sa natad sa boksing nga sila si Wilson Haya, Marjo Borres ug Gil Melliguen nga moharong batok sa managlahing kaatbang.