Kini tungod kay si RP Team coach Chot Reyes ug ang iyang mga batos nilarga niadtong Lunes didto sa Doha, Qatar aron mosalmot sa Al-Emadi International Basketball Tournament diin ilang sangkaon ang national teams sa Angola, Latvia ug host Qatar.
Mangulo sa Team Pilipinas mao sila si Kerby Raymundo sa bag-o lang nakampiyon sa PBA Philippine Cup Purefoods Chunkee Giants ug si Willie Miller sa Alaska Aces.
Mo-uban sa panon mao sila si Dorian Pena, Mick Pennisi, Billy Mamaril, Rafi Reavis, Larry Fonacier, slam dunk king Niño Canaleta ug si Arwind Santos, ang nag-unang kandidato aron mamahimong No. 1 overall pick sa umaabot nga PBA draft.
Nikompleto sa komposisyon sa Team Pilipinas mao sila si Dennis Miranda ug PBA rookie hopefuls Joseph Yeo ug LA Tenorio.
Niining pagsulat, ang Team Pilipinas nakigharong pa sa African champion Angola didto sa Gharafa Club gym.
Karong adlawa, ilang sangkaon ang Qatar ug ugma ilang ikaatbang ang Latvia.
Human sa ilang pagpanulong sa Qatar, ang SMC-Team Pilipinas moduwa og duha ka exhibition games batok sa FIBA-Asia runner-up Lebanon karong Agosto 13 ug 16.
Manalipod sab sila sa ilang titulo sa Sultan's Cup didto sa Brunei batok sa pipila ka lig-ong club teams sa Asya.