Tipasi All-Star kampiyon na sa SWFC

Ang Tipasi All-Star nitumba sa CX Plus John Arne Construction, 71-64 aron pagdaog sa kampiyonato sa Sunday Wednesday Friends Club (SWFC) basketball tournament niadtong Domingo diha sa CEC gym.

Si playmaker Tata Mansubre nahimong bida sa Tipasi All-Star, dili lamang sa puntos, apan lakip na usab ang gihungit niyang assists ngadto nilang Ekong Unajan ug Glenn Cabiluna, nga wala kapugngi ang ilang kamangtas sa mga dagkung tawo sa John Arne.

Ang idlas nga guwardiya sa Tipasi nga si Mansubre maoy nangulo sa maong kalampusan uban sa iyang 15 puntos, samtang sila si Unajan ug Cabiluna, kinsa niduwa og center-forward positions, nakatampo sab sa maong kadaugan. Si Unajan nibugha og 14 puntos ug si Cabiluna niambit sa iyang 12 puntos.

Si Jimbo Noel kinsa nipupo og 15 puntos, maoy nangulo sa pilderong John Arne, uban sa suporta ni kanhi UC forward Joselito Ocampo nga nipuno sab og 15 puntos.

Ang ilang topgunner nga si Vincent 'Inting' Reyes igo lang naka-iskor og 14 puntos, apan iyang nadaog ang most valuable player (MVP) plum.

Ang playing coach sa Tipasi nga si Atty. Jun Felicitas maoy nidaog isip best coach.