Bautista nibiya sa bantamweight

Si ALA Boxing Gym sensation Rey 'Boom Boom' Bautista boluntaryong mibakante sa iyang titulo isip World Boxing Organization (WBO) Asia Pacific bantamweight champion aron mokampanya sa super bantamweight (jr featherweight) division.

"We already made a decision for Bautista to vacate his WBO Asia Pacific bantamweight title and campaign in a heavier weight division," matud pa ni Antonio 'Bidoy' L. Aldeguer, ang nag-atiman sa career ni Bautista.

Si international promoter Sammy Gello-ani, nga maoy kaabag ni Aldeguer pagkupot sa career ni Bautista uban sa Oscar de la Hoya-managed Golden Boy Promotions, nagkanayon nga ang garbo sa mga Bol-anon batan-on pa kaayo ug mas komportable kini nga mo-away ubos sa timbang nga 122 libras.

"We have already sent a formal letter to Leon Panoncillo (WBO vice president) of our intention to have him (Bautista) vacate the title," matud pa ni Gello-ani.

Bisan og bag-o pa niyang gihubo ang iyang korona sa bantamweight division, si Bautista nakaaway na og duha ka higayon ubos sa super bantamweight didto sa Amerika.

Ang una niadtong bisperas sa pasko sa miaging tuig diin siya nakabangon human matumba sa ikaduhang hugna dayon na ngadto sa pagpukan ni Gerardo Espinoza pinaagi sa unanimous decision didto sa Sycuan Resort and Casino sa California. Ang ikaduha miresulta ngadto sa pagkahagba ni Nicaraguan Roberto Bonilla sa ikatulong hugna didto sa Staples Center sa Los Angeles.

Si Bautista mogikan sa Amerika karong Agosto 10 aron mangandam sa umaabot niyang away batok ni Moises 'Matador' Gutierrez sa Chile karong Septiyembre 16 didto sa MGM Grand Hotel and Casino sa Las Vegas, Nevada.

Uban ni Bautista mao ang iyang trainer nga si Edito 'ALA' Villamor ug stablemate Alex John 'AJ' Banal, nga adto na sab mokampanya sa Amerika.

Ang away nilang Bautista ug Gutierrez magsilbeng undercard sa gi-atngan nga rematch tali nilang WBC super featherweight champion Marco Antonio Barrera ug Rocky Juarez.

Si Gutierrez nagbitbit og rekord nga 15-3, 6KOs, samtang si Bautista way pilde sa 20 ka away diin 15 sa mga biktima pulos gipatikangkang.