Inaasahan ng NCAA Management Committee (ManCom) na mapupuno ng mga high school at college students, alumni at avid supporters ng Letran College at San Beda College ang 6,000-seater stadium.
"Gusto ko lang ipakiusap sa mga basketball supporters ng Letran at San Beda na mag-support tayo for our respective teams in a nice manner," ani coach Louie Alas kahapon. "Alam kong grabe ang rivalry ng dalawang teams na ito at sana walang untowards incident na mangyari."
Noong 1950 lamang nag-agawan para sa NCAA crown ang Knights at ang Red Lions kung saan tinanghal na kampeon ang Intramuros-based cagers sa pamumuno ni Larry Mumar.
Nakatakda sanang magsagupa ang Knights at ang Red Lions kahapon ngunit kinansela ng NCAA ManCom dahilan sa bagyong si "Glenda".
Kasalukuyang hawak ng Letran ang pangunguna mula sa kanilang matayog na 6-0 rekord kasunod ang San Beda (5-1), PCU (5-2), Mapua (3-3), San Sebastian (3-4), UPHD (2-5), Jose Rizal (1-5) at St. Benilde (1-6).
Sa ticket sales, nakabili na ang Letran community ng 600 tiket para sa general admission na nagkakahalaga ng P50 bawat isa bukod pa sa 300 sa upper box (P80) at 100 sa lower box (P150).
Kinuha naman ng San Beda ang 300 tickets sa lower box, 500 sa upper box at 400 sa general admission. (Russell Cadayona)