Si Ricky Ballesteros sa Cebu City Sports Commission, ang local counterpart sa national organizing group Nestlé Phils. Inc. miingon nga ang registration ipasubay sa "first-come-first-served basis.
"We only received 15,000 registration forms and we agreed to set August 12 as the deadline for the submission of registration forms," matud pa ni Ballesteros
Apan si Ballesteros mibutyag nga ang Nestlé Phils., ang tiggama sa Milo, misaad nga mopadala sila og dugang entry forms dinhi sa Sugbo kun aduna pay sobra nga porma gikan sa ubang elimination centers.
Ubos sa pagdumala ni Ballesteros, ang Cebu leg nakakuha og national record nga pinakadaghan nga partisipante sa Milo elimination sud sa duha ka sunod-sunod nga katuigan.
Nagsugod kini niadtong 2004 diin ang Sugbo adunay 18,000 runners nga misalmot sa lumba ug sa miaging tuig, nabuak ang rekord diin niabot kini sa 20,000.
Ang registration anha himoa sa Cebu City Sports Center, apan niadtong mga tinun-an nga buot mosalmot sa lumba adto lang kini sa ilang PE teachers.
Ang elimination race adunay tulo ka kategoriya, ang premier 21-kilometer run diin ang nag-unang tulo ka mananaog sa lumba maoy morepresentar sa Sugbo alang sa National Marathon Finals didto sa kaulohan.
Lain pang mga kategoriya sa maong lumba mao ang 5K Fun Run ug ang 3K Kiddies Run.
Ang registration fee sa 21K race nagkantidad og P100, samtang ang 5K nagkantidad og P40 ug ang 3K P30 libre na niini ang t-shirt ug race number.
Ang magparehistro kinahanglan usab nga makapakita og usa ka 300-gram empty pack sa Milo.