MLSDF-Mantawi kampiyon na

Ang gipabuhagay nga opensa sa M. Lhuillier Sports Development Foundation (MLSDF)-Mantawi Traders Dream Team katapusang kuwarter maoy nakatabang pagpukan sa Lilo-an Selection, 74-66 ug aron usab pagsakmit sa kampiyonato sa 10th Compostela Mayor's Cup Under-21 basketball tournament niadtong Huwebes sa gabii didto sa Compostela Sports Complex.

Sila si Joven 'Yao Ming' Cortes, Francis Luigi Bercede, Phil Mercader ug Jeffrey Moriles maoy nagpasiugda sa mainit nga rally, 25-6 nga maoy nakapabangon sa MLSDF-Mantawi human malubong og 11 puntos sa ikatulong kuwarter, 60-49.

Human mipabuto og 13-2 run aron pagtabla sa iskor, 62-62, si Bercede milansang og 3-point shot aron pagpalabaw og balik sa Mantawi Traders, 65-62, sa nahabiling singko minutos sa duwa.

Gipun-an kini ni Bercede pinaagi sa iyang running jumper nga maoy miabli sa 6-0 run sa iskor nga 71-64 sa daginutong segundo sa duwa.

Si Cortes mitali og 18 puntos, samtang si Moriles mi-amot og 11 puntos. Sila si Bercede, Clint Florido ug Anjan Cabahug nagkumboya og 23 puntos alang sa Mantawi.

Nangulo sa Lilo-an mao si Marlon Tagalog sa iyang 21 puntos.

Ang kadaogan sa Mantawi naghatag ni head coach Hermogenes "Ancing" Anciado sa ikatulo niining korona sukad siya napadpad sa Cebu coaching circuit tulo na ka tuig ang milabaw.

Si Anciado migiya sa Sacred Heart School-Jesuit ngadto sa juniors division championship sa ML Kwarta Padala Inter-School Developmental Basketball Tournament niadtong tuig 2004 ug siya sab maoy nagdala sa Southwestern University nga milabni sa korona sa Cebu City Olympics collegiate basketball event sa susamang tuig.